ရွှေနန်းရှင်နှင့် အာဏာပိုင် အပိုင်း(၂)

အသက်ကိုးနှစ်လောက်ကတည်းက ထိုင်းဘုရင်ဖြစ်လာတဲ့ အနန္ဒမဟီဒေါဟာ ဖခင်ဖြစ်သူ နိုင်ငံခြားရောက်နေတဲ့အချိန် ဂျာမနီနိုင်ငံ၊ Heidelberg မှာ မွေးဖွားခဲ့သူဖြစ်ပါတယ်။ ထိုင်းဘာသာစကားထက် ဥရောပဘာသာစကားတွေကို ပိုကျွမ်းကျင်ပြီး အနောက်တိုင်းယဉ်ကျေးမှုနဲ့ ကြီးပြင်းခဲ့ရသူဖြစ်ပါတယ်။ သူ့ခမည်းတော်မင်းသား မဟီဒေါကိုယ်တိုင်က ထီးညွှန့်နန်းလျာမဖြစ်ခဲ့တဲ့အတွက် အနန္ဒမဟီဒေါနဲ့ ဘူမိဘောတို့ညီအစ်ကိုဟာ နောင်တချိန်မှာ ဘုရင်ဖြစ်လာလိမ့်မယ်လို့ ဘယ်သူကမှ မမျှော်လင့်ခဲ့ကြပါဘူး။ အနန္ဒမဟီဒေါဘုရင်ဖြစ်ပြီးတဲ့အချိန်ထိ နိုင်ငံခြားမှာ ကြီးပြင်းလာခဲ့တဲ့ ညီနောင်နှစ်ပါးဟာ အချင်းချင်းစကားပြောရင် မိခင်ထိုင်းဘာသာစကားနဲ့ မပြောပဲ ပြင်သစ်စကားနဲ့ပဲ ပြောလေ့ရှိတယ်လို့ သိရပါတယ်။ ကိုယ်ဟန်အမူအရာ ယဉ်ကျေးသိမ်မွေ့ပြီး ကျန်းမာရေးချူချာတဲ့ အနန္ဒမဟီဒေါဟာ မိခင်ဖြစ်သူရဲ့ အချစ်ဆုံးသားကြီးဖြစ်ပါတယ်။

အနန္ဒမဟီဒေါနှင့် ဘူမိဘော ညီအစ်ကို

ထိုင်းနိုင်ငံကိုအလည်ပြန်လာတဲ့ အနန္ဒမဟီဒေါဘုရင်လေး

မင်းပျိုမင်းလွင် ညီနောင်နှစ်ပါး


ချက္ကရီမင်းဆက်ရဲ့ အဌမမြောက်ရာမဘုရင် အနန္ဒမဟီဒေါရဲ့ ပဟေဠိဆန်တဲ့ နတ်ရွာစံမှုမတိုင်ခင် ၇-လအလို ၁၉၄၅ခုနှစ် ဒီဇင်ဘာလ ၅ရက်နေ့မှာ ဆွစ်ဇာလန်ကနေ ထိုင်းကိုပြန်လာတဲ့ အနန္ဒမဟီဒေါမိသားစုကို အစိုးရက ခန့်အပ်ထားတဲ့ ဘုရင့်ကိုယ်စားလှယ်တော် ပရီဒီ(Pridi Phanomyong)က ဒွန်မောင်းလေဆိပ်မှာ တော်ဝင်အခမ်းအနားနဲ့ဒူးထောက်ကြိုဆိုခဲ့ပါတယ်

ထိုင်းနိုင်ငံရေးလောကထဲမှာ ကြီးထွားလာခဲ့ပါတယ်။ မဟီဒေါဘုရင်လေး ထိုင်းကိုပြန်လာပြီး မကြာခင်မှာပဲ ပြိုင်ဖက် စစ်အာဏာရှင်ဆုန်ခရမ်ကို ရာထူးကနေဖယ်ရှားပြီးနောက်ပိုင်း ပရီဒီရဲ့သြဇာဟာ ပရီဒီဟာ ဘုရင့်ကိုယ်စားလှယ်တော် ရာထူးကနေ ပြန်နုတ်ထွက်ခဲ့ပြီး နိုင်ငံတော်အကြံပေးအရာရှိအဖြစ် တာဝန်ယူခဲ့ပါတယ်။ ထိုင်းစကားကို ကျွမ်းကျွမ်းကျင်မပြောတတ်သေးတဲ့၊ ထိုင်းယဉ်ကျေးမှုနဲ့ စိမ်းနေသေးတဲ့ ဘုရင်လေးဟာ အစောပိုင်းကာလတွေမှာ ပရီဒီပုံစံသွင်းသလို လိုက်လုပ်နေခဲ့တာပါ။ ဒါပေမယ့် လပိုင်းအတောအတွင်းမှာပဲ အာနန္ဒမဟီဒေါဘုရင်လေးဟာ ထိုင်းပြည်သူတစ်ရပ်လုံးရဲ့ နှလုံးသားကို ရာဇအိနြေ္ဒအပြည့်နဲ့ သိမ်းပိုက်နိုင်ခဲ့ပါတော့တယ်။

နန်းစွန့်ဘုရင် ဖရာချာ့ဒိပေါက်ခ်ရဲ့နေရာကို ဆက်ခံဖို့  အာနန္ဒမဟီဒေါကို ထီးညွှန့်နန်းလျာအဖြစ် ရွေးချယ်တဲ့နေရာမှာ အစိုးရထဲက မင်းဆွေမင်းမျိုးတွေအပြင် အရပ်သားအစိုးရအဖွဲ့ဝင် ပရီဒီလည်း နောက်ကွယ်ကနေ ပါဝင်ခဲ့ပါတယ်။ မဟီဒေါဘုရင်မိသားစု လေဆိပ်ကနေ အမိုးဖွင့်ကားနဲ့ နန်းတော်ဆီသွားရာ လမ်းတလျှောက်မှာ ထောင်ပေါင်းများစွာရှိတဲ့ ထိုင်းပြည်သူတွေဟာ သူတို့ရဲ့ဘုရင်လေးကို သောင်းသောင်းဖြဖြ ကြိုဆိုခဲ့ကြပါတယ်။ အဲဒီအချိန်မှာ နိုင်ငံရေးလောကရဲ့ အပြင်ဖက်က သာမန်ထိုင်းပြည်သူတွေဟာ မကြာခင်မှာ ကြုံရမယ့် အနန္ဒမဟီဒေါရဲ့ ဖြစ်ရပ်ဆိုးကို ယောင်လို့တောင် တွေးမိမှာမဟုတ်ပါဘူး။

ညီတော်နှင့်အတူ တိုင်းခိုင်းလှည့်လည်နေသော အနန္ဒမဟီဒေါဘုရင်

အသက် ၂၀ အရွယ် အနန္ဒမဟီဒေါ ဘုရင့်တာဝန်ကို အပြည့်အ၀ထမ်းဆောင်နေတဲ့အချိန်မှာ ထိုင်းနိုင်ငံရေးလောကထဲမှာ ပါဝါလွန်ဆွဲမှုတွေ ပြင်းထန်လာနေခဲ့ပါတယ်။ ပရီဒီရဲ့ သြဇာကြီးမားလာတာနဲ့အမျှ နိုင်ငံရေးလောကထဲမှာ ပရီဒီကိုထောက်ခံတဲ့အုပ်စုနဲ့ သူ့ကို တူးတူးခါးခါး ဆန့်ကျင်တဲ့အုပ်စုဆိုပြီး နှစ်စုကွဲနေခဲ့ပါတယ်။ ပရီဒီကိုဆန့်ကျင်တဲ့ အုပ်စုထဲမှာတော့  ပရီဒီရဲ့ပြိုင်ဖက် မင်းဆွေမင်းမျိုးတစ်ဦးဖြစ်တဲ့ ၀န်ကြီးချုပ် Seni Pramoj ရဲ့ Royalist ဘက်တော်သားတွေ ပါဝင်နေပါတယ်။ ၀န်ကြီးချုပ် Seni ရာထူးကနှုတ်ထွက်တဲ့အချိန်မှာ ပရီဒီကို ထောက်ခံတဲ့အုပ်စုတွေက သူ့ကို ၀န်ကြီးချုပ်အဖြစ် အဆိုတင်သွင်းခဲ့ပေမယ့် သူကငြင်းဆန်ပြီး သူ့ရဲ့ဘက်တော်သားတစ်ဦးကို ၀န်ကြီးချုပ်လောင်းအဖြစ် အဆိုပြုခဲ့ပါတယ်။ ဒါပေမယ့် ပါလီမန်က ပရီဒီအဆိုပြုတဲ့ပုဂ္ဂိုလ်ကို မရွေးပဲ ယခင်ဝန်ကြီးချုပ်ဟောင်းတစ်ဦးဖြစ်တဲ့ Khuang Aphaiwong ကို ထိုင်းနိုင်ငံရဲ့ဝန်ကြီးချုပ်အဖြစ် ပြန်လည်တင်မြှောက်လိုက်ပါတယ်။ Khuang ဟာရာထူးလက်ခံပြီး အစိုးရဖွဲ့တဲ့အခါ ပရီဒီကိုဆန့်ကျင်တဲ့အုပ်စုထဲက မင်းဆွေမင်းမျိုးတချို့ကို ၀န်ကြီးရာထူးတွေ ပေးခဲ့ပါတယ်။ တပ်မတော်ဗိုလ်မှူးဟောင်းနဲ့ ဥပဒေပညာရှင်တစ်ဦးဖြစ်တဲ့ Khuang ရဲ့ ဒုတိယအကြိမ်မြောက် ၀န်ကြီးချုပ်ရာထူးသက်တမ်းဟာ သုံးလပဲကြာမြင့်ခဲ့ပြီး ၁၉၄၆ ဇန်န၀ါရီကနေ မတ်လထိပဲ အာဏာရှိခဲ့တာပါ။ Khuang ရာထူးကနေ နုတ်ထွက်သွားတဲ့အချိန်မှာ ပရီဒီတစ်ယောက် ထိုင်းနိုင်ငံရဲ့ ၀န်ကြီးချုပ်ဖြစ်လာခဲ့ပါတယ်။

ဝန်ကြီးချုပ် ပရီဒီ

သမ္မာဆတ်တက္ကသိုလ်ကို စတင်ထူထောင်သူနဲ့ ထိုင်းနိုင်ငံရေးစနစ် ပြုပြင်ပြောင်းလဲရေးမှာ အဓိကဗိသုကာတစ်ဦးဖြစ်တဲ့၊ ပြည်ထဲရေးဝန်ကြီး၊ဘဏ္ဍာရေးဝန်ကြီး၊နိုင်ငံခြားရေးဝန်ကြီး၊ ဘုရင့်ကိုယ်စားလှယ်တော် တာဝန်တွေကို အဆင့်ဆင့်ထမ်းဆောင်ပြီး ၀န်ကြီးချုပ်ဖြစ်လာတဲ့ ပရီဒီဟာ ထိုင်းနိုင်ငံရဲ့ အထင်ရှားဆုံး တိုင်းပြုပြည်ပြုပုဂ္ဂိုလ်(Stateman) တစ်ဦးဖြစ်ပါတယ်။ ဒါပေမယ့် ပရီဒီလက်ထဲက နိုင်ငံရေးအာဏာဟာ ဘုရင်အနန္ဒမဟီဒေါ ရုတ်တရက် နတ်ရွာစံမှုကြောင့် တာရှည်မခံခဲ့ပါဘူး။

၁၉၄၆ခုနှစ် ဇွန်လ ၇ရက်နေ့မှာ ဘုရင်မဟီဒေါက ၀န်ကြီးချုပ်ပရီဒီကို ဘုရင့်ကိုယ်စားလှယ်တော်ကောင်စီကို အသစ်ပြန်လည်ဖွဲ့စည်းမယ့်ကိစ္စနဲ့ ပတ်သက်ပြီး ခေါ်တွေ့ပါတယ်။ ကောင်စီအဖွဲ့ဝင်ရွေးချယ်တဲ့နေရာမှာ ပရီဒီနဲ့ ဘုရင်မင်းမြတ် သဘောထားကွဲလွဲပြီး အငြင်းပွားခဲ့တယ်လို့ သိရပါတယ်။ အဲဒီအငြင်းပွားမှုဟာ နောင်တချိန်မှာ ဆန့်ကျင်ဖက်အုပ်စုတွေက ပရီဒီရဲ့ နောက်ကျောကိုဓားနဲ့ထိုးဖို့ အကောင်းဆုံးအခွင့်အရေးတစ်ခု ဖြစ်သွားခဲ့ပါတယ်။

ပရီဒီနဲ့ဘုရင်မဟီဒေါတို့ အငြင်းပွားမှုအပြီး နောက်နှစ်ရက်အကြာမှာ တိတ်ဆိတ်ငြိမ်သက်နေတဲ့ နန်းတော်တွင်းမှာ သေနတ်သံတစ်ချက် ရုတ်တရက်ထွက်ပေါ်လာပါတယ်။ မယ်တော်၊ညီတော်ဘူမိဘောနဲ့ နန်းတော်အမှုထမ်းတွေဟာ သေနတ်သံထွက်ပေါ်လာရာ ဘုရင့်စက်ရာဆောင်ကို အပြေးအလွှားရောက်သွားတဲ့အချိန်မှာတော့ ညအိပ်ဝတ်စုံအပြာရောင်ကို ၀တ်ဆင်ထားတဲ့ ဘုရင်လေးဟာ နဖူးမှာသေနတ်ဒဏ်ရာနဲ့ အိပ်ရာထဲမှာ အသက်မဲ့နေတာကို တွေ့လိုက်ရပါတော့တယ်။ သူ့နဘေးမှာတော့ အမေရိကန်စစ်တပ်သုံး Colt.45 ပစ္စတိုကို တွေ့လိုက်ရပါတယ်။ အဲဒီအချိန်မှာတော့ အမြဲတမ်း တိတ်ဆိတ်ငြိမ်သက်နေတဲ့ ထိုင်းဘုရင့်နန်းတော်တစ်ခုလုံး ငိုကြွေးရှိုက်သံတွေနဲ့ ဆူညံသွားခဲ့ပါတော့တယ်။  တသက်တာပတ်လုံး ငါးနှစ်တောင်ပြည့်အောင် မနေဖူးတဲ့  ထိုင်းနိုင်ငံဟာ အနန္ဒမဟီဒေါဘုရင်လေးအတွက် ခေါင်းချရာနေရာဖြစ်သွားခဲ့ပါပြီ။

အနန္ဒမဟီဒေါနတ်ရွာစံပြီး မကြာခင်မှာပဲ ထိုင်းပါလီမန်မှာ အရေးအပေါ်အစည်းအဝေးတစ်ခု ဆင့်ခေါ်ပြီး လစ်လပ်သွားတဲ့ ဘုရင့်နေရာကို ခန့်အပ်ဖို့ အရေးတကြီး ဆွေးနွေးပြီးတဲ့နောက်မှာတော့ ချက္ကရီထီနန်းဟာ ညီတော်ဘူမိဘောမင်းသားအတွက် ဖြစ်လာခဲ့ပါတယ်။ ဘသိက်မြှောက်အခမ်းအနားမှာ တော်ဝင်ကောင်စီအကြီးအကဲ မင်းသားကြီး ရန်ဂ်စစ်က ချက္ကရီထီးနန်းဦးသျှောင်သရဖူကို န၀မမြောက်ရာမဘုရင်အဖြစ် နန်းတက်တဲ့ ဘူမိဘောအဒူလျာဒက်ကို အပ်နှင်းပေးခဲ့ပါတယ်။

မင်းသား ဘူမိဘော ထိုင်းဘုရင် ရာမ ၉ အဖြစ် ဘိသက်ခံယူစဉ်

ဘူမိဘောဘုရင်နန်းတက်ပြီးမကြာခင်မှာပဲ ထိုင်းအစိုးရ၀န်ကြီးချုပ် ပရီဒီဟာ ထုံးတမ်းစဉ်လာအတိုင်း ဘုရင့်ရှေ့တော်ကို အခမ်းအနားနဲ့ အခစားဝင်ရောက်ခဲ့ပါတယ်။

မဟီဒေါဘုရင် သေနတ်ဒဏ်ရာနဲ့ နတ်ရွာစံတဲ့ဖြစ်ရပ်ကို အစိုးရက ဖြစ်ဖြစ်ချင်း ဇွန်လ၉ရက်နေ့မှာ မတော်တဆမှုအဖြစ် သတင်းထုတ်ပြန်ခဲ့ပါတယ်။ 

ဒီသတင်းထုတ်ပြန်ချက်ဟာ ၀န်ကြီးချုပ်ပရီဒီက ဘုရင့်မယ်တော်၊ တော်ဝင်ကောင်စီအကြီးအကဲ မင်းသားကြီး ရန်ဂ်စစ်တို့နဲ့ တိုင်ပင်ပြီး ထုတ်ပြန်ခဲ့တယ်လို့ သိရပါတယ်။ ဒီထုတ်ပြန်ချက်ထဲမှာ အစာအိမ်ရောဂါ ခံစားနေရပြီး အားနည်းနေတဲ့ ဘုရင်လေးဟာ သေနတ်ကိုဆော့ကစားရင်း မတော်တဆ ကျည်ထိမှန်ပြီး နတ်ရွာစံသွားတယ်လို့ ဖော်ပြထားပါတယ်။ ဒါပေမယ့် ရက်ပိုင်းအတွင်းမှာပဲ နန်းတော်အသိုင်းအ၀ိုင်းနဲ့ နိုင်ငံရေး လောကထဲမှာ ဘုရင်နတ်ရွာစံမှုနဲ့ ပတ်သက်ပြီး ကောဟာလဟတွေ အများကြီးထွက်ပေါ်လာခဲ့ပါတယ်။ တော်ဝင်မိသားစုနဲ့ နီးစပ်တဲ့ အသိုင်းအ၀ိုင်းကထွက်လာတဲ့ ကောဟာလဟတွေထဲမှာတော့ ဘုရင်လေးဟာ မိသားစုနဲ့ ကိုယ်ရေးကိုယ်တာပြဿနာတွေကြောင့် စိတ်ဖိစီးမှုများပြီး ကိုယ့်ကိုယ်ကို သေကြောင်းကြံတာဖြစ်တယ် ဆိုတဲ့အချက်ဟာ အတော့်ကိုရေပန်းစားခဲ့ပါတယ်။ မဟီဒေါဘုရင်လေးမကွယ်လွန်ခင် မယ်တော်ဖြစ်သူ မုဆိုးမဆန်ဂ်ဝါနဲ့ အကြီးအကျယ်စကားများခဲ့ပြီး အဲဒီပြဿနာဖြစ်တဲ့အကြောင်းရင်းက အရွယ်ရှိသေးတဲ့ မုဆိုးမမိခင်ဖြစ်သူရဲ့ နှလုံးသားရေးရာ ဇာတ်ရှုပ်တွေကြောင့် အရှက်ရပြီး သေကြောင်းကြံတာ ဖြစ်တယ်လို့ သတင်းထွက်ခဲ့ပါတယ်။ နောက်ထပ် ကောဟလဟတစ်ခုက အနန္ဒမဟီဒေါဟာ သူသဘောမတူပဲ ဘုရင်အဖြစ်အတင်းအကြပ် တင်မြှောက်ခံခဲ့ရတဲ့အတွက် ဆွစ်ဇာလန်မှာ တက္ကသိုလ်တက်တုန်းက ချစ်ကြိုက်ခဲ့တဲ့ ဆွစ်လူမျိုးချစ်သူနဲ့ ကွဲကွာခဲ့ရလို့ အသည်းကွဲပြီး ကိုယ့်ကိုယ်ကို သေကြောင်းကြံတာဖြစ်တယ် ဆိုတဲ့ သတင်းပဲဖြစ်ပါတယ်။ ဒီသတင်းတွေဟာ ဖြစ်နိုင်ချေရှိပေမယ့် သက်သေအထောက်အထား ခိုင်ခိုင်လုံလုံမပြနိုင်တဲ့ ကောဟာလဟတွေ ဖြစ်ကြပါတယ်။ နောက်ပိုင်းမှာ အစိုးရက စုံစမ်းရေးကော်မရှင်တစ်ရပ်ဖွဲ့ပြီး စုံစမ်းစစ်ဆေးခဲ့ပါတယ်။ ၁၉၄၆ခုနှစ် အောက်တိုဘာမှာ ထုတ်ပြန်ခဲ့တဲ့ စုံစမ်းရေးကော်မရှင်ရဲ့ အစီရင်ခံစာမှာတော့ ဘုရင်နတ်ရွာစံခြင်းဟာ မတော်တဆဖြစ်မှု လုံးဝမဟုတ်ဘူးလို့ ဖော်ပြခဲ့ပါတယ်။ ဒါပေမယ့် လုပ်ကြံခံရတာ ဒါမှမဟုတ် ကိုယ့်ကိုယ်ကို သေကြောင်းကြံတာလားဆိုတာနဲ့ ပတ်သက်ပြီးတော့ သဲသဲကွဲကွဲ ဖော်ပြထားတာ မတွေ့ရပါဘူး။ ထိုင်းနိုင်ငံတ၀န်းလုံးမှာ ပြန့်နှံ့နေတဲ့ မေးခွန်းတစ်ခုကတော့ အနန္ဒမဟီဒေါကို ဘယ်သူလုပ်ကြံတာလဲ ဆိုတဲ့မေးခွန်းပဲဖြစ်ပါတယ်။

အဲဒီမေးခွန်းအတွက် ရေပန်းအစားဆုံး ကောဟာလဟကတော့ ဘုရင်မဟီဒေါကို ၀န်ကြီးချုပ်ပရီဒီနဲ့ လက်ပါးစေတွေက လုပ်ကြံသတ်ဖြတ်ခဲ့တာဖြစ်တယ်ဆိုတဲ့ သတင်းပဲဖြစ်ပါတယ်။ အဲဒီသတင်းဟာ ပရီဒီကို မုန်းတီးနေတဲ့ မင်းမျိုးမင်းနွယ်အသိုင်းအ၀ိုင်းကနေ ထွက်လာတာဖြစ်ပြီး တော်ဝင်ကောင်စီ ရွေးချယ်ရေးကိစ္စနဲ့ ပတ်သက်ပြီး အနန္ဒမဟီဒေါနဲ့ပရီဒီကြားမှာ ဖြစ်ပွားခဲ့တဲ့ သဘောထားကွဲလွဲမှုကို အခြေခံပုံရပါတယ်။ ဒါပေမယ့် ဒီစွပ်စွဲမှုအတွက် ခိုင်မာတဲ့ သက်သေအထောက်အထား မယ်မယ်ရရမပြနိုင်ပဲ ပရီဒီကို နိုင်ငံရေးလောကကနေ ဖယ်ရှားလိုတဲ့ရည်ရွယ်ချက်နဲ့ ထွက်လာတဲ့ ကောဟာလဟပဲဖြစ်ပါတယ်။ နောက်ထပ် ကောဟာလဟတစ်ခုကတော့ ညီတော်ဘူမိဘောဟာ ဘုရင်ဖြစ်ချင်တဲ့အတွက် နောင်တော်ကို လုပ်ကြံသတ်ဖြတ်ခဲ့တယ်ဆိုတဲ့ ကောဟာလဟပဲဖြစ်ပါတယ်။ အနန္ဒမဟီဒေါအခန်းက သေနတ်သံထွက်ပေါ်မလာခင် မိနစ်၂၀ခန့်အလိုမှာ နောက်ဆုံးတွေ့ဆုံခဲ့သူက ညီတော်ဘူမိဘောပဲဖြစ်ပါတယ်။ ဘူမိဘောဟာ နောင်တော်ရဲ့အခန်းကို ၀င်ခဲ့ပြီး အဲဒီအချိန်မှာ နောင်တော်ဟာ အိပ်ရာပေါ်မှာ ငိုက်မြည်းနေတယ်လို့ စုံစမ်းထောက်လှမ်းတဲ့အချိန်မှာ ထွက်ဆိုခဲ့ပါတယ်။ ဒါပေမယ့် ညီတော်ဘူမိဘောက နောင်တော်ကို လုပ်ကြံသတ်ဖြတ်ခဲ့တယ်ဆိုတဲ့အချက်နဲ့ ပတ်သက်လို့ ခိုင်မာတဲ့သက်သေအထောက်အထား မတွေ့ရပါဘူး။ ခုချိန်ထိ တရားခံတိတိကျကျ မဖော်ထုတ်နိုင်ခဲ့တဲ့ ဒီပဟေဠိဆန်တဲ့ သေဆုံးမှုဟာ လက်ရှိဘုရင်ဘူမိဘောရဲ့ လက်ချက်ဖြစ်တယ်၊ သူ့ရဲ့သြဇာကြောင့် ဒီအမှုကို ခုချိန်ထိဘယ်သူမှ မဖော်ထုတ်နိုင်ခဲ့ဘူးဆိုတဲ့ သံသယကတော့ ဆယ်စုနှစ်ပေါင်းများစွာ ကြာတဲ့အထိ တည်ရှိနေတုန်းပါပဲ။ ဒီကောဟာလဟတွေနဲ့ ပတ်သက်ပြီး နိုင်ငံခြားသံတမန်တွေဆီကို နန်းတွင်းအသိုင်းအ၀ိုင်းကနေ လူသတ်တရားခံအဖြစ် အများဆုံးလက်ညှိုးထိုးခဲ့တာကတော့ ၀န်ကြီးချုပ်ပရီဒီပဲဖြစ်ပါတယ်။

ဘုရင်ဘူမိဘောက ပရီဒီဟာ သူ့နောင်တော်ကို လုပ်ကြံခဲ့တဲ့ကိစ္စမှာ ပါဝင်ပတ်သက်လိမ့်မယ်လို့ သူမထင်ဘူးဆိုပြီး နောက်ပိုင်းမှာ အလွတ်သဘောပြောခဲ့ပေမယ့် စုံစမ်းရေးကော်မရှင်မှာ ထွက်ဆိုတဲ့အချိန်တုန်းကတော့ အဲဒီကောဟာလဟနဲ့ ပတ်သက်ပြီး ဘာတစ်ခုမှ မှတ်ချက်မပေးခဲ့ပါဘူး။ အဲဒီအချက်ကိုကြည့်ရင် အမှုစစ်ဆေးစဉ်ကာလ အတောအတွင်းမှာ  ဘူမိဘောရဲ့ ရပ်တည်မှုအနေအထားက စဉ်းစားစရာဖြစ်နေပါတယ်။ ဒီလိုမျိုးစွပ်စွဲမှုတွေ၊ ကောဟာလဟတွေနဲ့ ရှုပ်ထွေးနေတဲ့အချိန် ဘုရင်အနန္ဒမဟီဒေါရဲ့ နတ်ရွာစံမှုနဲ့ပတ်သက်ပြီး အများပြည်သူကို အသိပေးတဲ့အချိန်မှာ နတ်ရွာစံဘုရင်ရဲ့ ဂုဏ်သိက္ခာပိုင်းနဲ့ ပတ်သက်ပြီး တော်ဝင်အသိုင်းအ၀ိုင်းမှာ အငြင်းပွားစရာဖြစ်ခဲ့ပါတယ်။ တိုင်းပြည်က ဘုရားတစ်ဆူ၊ဂူတစ်လုံး ကိုးကွယ်ခံထားရတဲ့ ဓမ္မရာဇာဟာ သေကြောင်းကြံတာ ဒါမှမဟုတ် ရှေးဘ၀ အကုသိုလ်ကြောင့် မတော်တဆကျည်ဆန်ထွက်ပြီး နတ်ရွာစံသွားရတယ်ဆိုတဲ့ အချက်ဟာ တော်ဝင်မိသားစုရဲ့ပုံရိပ်ကို အများကြီးထိခိုက်တယ်၊ ဘယ်လိုမှမဖြစ်နိုင်ဘူးဆိုတဲ့ ဝေဖန်မှုတွေထွက်ပေါ်ခဲ့ပါတယ်။ ပရီဒီအစိုးရကနေ သတင်းထုတ်ပြန်တဲ့ ဘုရင်မဟီဒေါဟာ မတော်တဆမှုကြောင့် နတ်ရွာစံသွားတယ်ဆိုတဲ့ အချက်ကို Royalist တွေက ခါးခါးသီးသီးငြင်းဆန်ခဲ့ပြီး လူသတ်မှုကိုဖုံးကွယ်ဖို့ ကြိုးစားတယ်ဆိုပြီး စွပ်စွဲခဲ့ကြပါတယ်။

အဲဒီစွပ်စွဲမှုတွေနဲ့ ရင်ဆိုင်ခဲ့ရတဲ့ ၀န်ကြီးချုပ်ပရီဒီဟာ အထွေထွေရွေးကောက်ပွဲအပြီး ၁၉၄၆ခုနှစ် သြဂုတ်လ ၂၃ရက်နေ့မှာ ၀န်ကြီးချုပ်ရာထူးကနေ နုတ်ထွက်ပေးလိုက်ရပါတယ်။ ပရီဒီရဲ့နေရာကို ဆက်ခံသူ ကတော့ သူ့ရဲ့မဟာမိတ် တစ်ဦးဖြစ်တဲ့ ထိုင်းနိုင်ငံရဲ့ အဌမမြောက် ၀န်ကြီးချုပ် သာဝန်သန်မ်ရောင် (Thawan Thamrongnawasawat) ပဲဖြစ်ပါတယ်။ ဒါပေမယ့် ၁၉၄၇ခုနှစ် နိုဝင်ဘာလ ၈ ရက်နေ့မှာ ထိုင်းတပ်မတော်က ဒုတိယဗိုလ်ချုပ်ကြီး Phin Choonhavan နဲ့ ဗိုလ်မှူးကြီး Kat Katsongkhram တို့ အာဏာ ပြန်သိမ်းလိုက်လို့ ၀န်ကြီးချုပ် သန်မ်ရောင် အစိုးရပြုတ်ကျပြီး ၀န်ကြီးချုပ်ဟောင်း Khuang Abhaiwongse ဟာ ထိုင်းနိုင်ငံရဲ့ ၀န်ကြီးချုပ် ရာထူးကို တတိယအကြိမ် ဆက်ခံခဲ့ပါတယ်။

စစ်အာဏာသိမ်းခေါင်းဆောင်တွေဟာ ပရီဒီကို အမြစ်ဖြတ်သုတ်သင်ဖို့ ဘုရင်အာနန္ဒမဟီဒေါကို လုပ်ကြံမှုနဲ့ ဖမ်းဆီးမိန့်ထုတ်လိုက်ပါတယ်။ ရဲတပ်ဖွဲ့ဝင်တွေဟာ ပရီဒီရဲ့နေအိမ်ကို ၀င်ရောက်စီးနင်းခဲ့ပေမယ့် သတင်းကြိုရထားတဲ့ ပရီဒီက ထိုင်းစစ်တပ်ထဲက မိတ်ဆွေအချို့ရဲ့အကူအညီနဲ့ ကြိုတင်ရှောင်တိမ်းနိုင်ခဲ့ပါတယ်။ ဆုန်ခရမ်ရဲ့လူတွေ ပိုက်စိပ်တိုက်လိုက်ရှာနေတဲ့ကြားက ၀န်ကြီးချုပ်ဟောင်းပရီဒီဟာ အမေရိကန်နဲ့ဗြိတိသျှသံရုံးအေးဂျင့်တချို့ရဲ့ အကူအညီနဲ့ ထိုင်းနိုင်ငံကနေ စင်္ကာပူကို ထွက်ပြေးတိမ်းရှောင်နိုင်ခဲ့ပါတယ်။ ၁၉၄၈ခုနှစ် ဧပြီလ ၈ရက်နေ့မှာတော့ ၀န်ကြီးချုပ် Khuang ရဲ့အစိုးရကို စစ်တပ်က အာဏာပြန်သိမ်းပြီး ထိုင်းနိုင်ငံဟာ စစ်အာဏာရှင်ဗိုလ်ချုပ်ကြီး ဆုန်ခရမ်ရဲ့လက်အောက်ကို ဒုတိယအကြိမ် သက်ဆင်းသွားခဲ့ရပါတော့တယ်။

စစ်အာဏာရှင် ၀န်ကြီးချုပ်ဆုန်ခရမ်ဟာ အနန္ဒမဟီဒေါဘုရင်သတ်ဖြတ်ခံရမှုကို စတင်စစ်ဆေးခဲ့ပါတယ်။ ဘုရင့်အတွင်းရေးမှူး Chaleo Patoomros နဲ့ ဘုရင့်အပါးတော်မြဲဝန်ထမ်းနှစ်ဦးဖြစ်တဲ့ Busya Patamasirind (၅၀နှစ်)နဲ့ Chit Singhaseni(၄၄နှစ်) တို့ကိုဖမ်းဆီးပြီး နိုင်ငံတော်လုပ်ကြံမှုနဲ့ တရားစွဲဆိုခဲ့ပါတယ်။

ဒီဖမ်းဆီးမှုနဲ့ပတ်သက်ပြီး လူအများက သံသယကြီးကြီး ၀င်ခဲ့ကြပါတယ်။ နောက်ကွယ်ကနေ ကြိုးကိုင်ထားတဲ့ တရားစီရင်မှုဖြစ်တဲ့အတွက် ခိုင်မာတဲ့သက်သေအထောက်အထား တိတိကျကျမရှိပဲ တရားခံသုံးဦးစလုံးဟာ နိုင်ငံတော်လုပ်ကြံမှုနဲ့ သေဒဏ်စီရင်ခံခဲ့ရပါတယ်။

ဘုရင်အနန္ဒမဟီဒေါရဲ့ ကိုယ်ရေးအတွင်းရေးမှူး အထက်လွှတ်တော်အမတ် Chaleo Patoomros ဟာ ဘုရင့်မယ်တော်ဆန်ဂ်ဝါရဲ့ တိတ်တိတ်ပုန်းချစ်သူဖြစ်တယ်ဆိုတဲ့ ကောဟာလဟတစ်ခု ထွက်ခဲ့ပါတယ်။ အဲဒီကောဟာလဟနဲ့ ပတ်သက်ပြီး စဉ်းစားစရာတစ်ခုကတော့ Chaleo အပါအ၀င် တရားခံသုံးဦးကိုဖမ်းဆီးပြီး သေဒဏ်မစီရင်ခင် တစ်လလောက်အလိုမှာ ဘုရင့်မယ်တော်ဟာ ရုတ်တရက် တရားစခန်းဝင်သွားပြီး လူတွေ့မခံပဲနေခဲ့တယ်ဆိုတဲ့ သတင်းပဲဖြစ်ပါတယ်။ အဲဒီလို ဆန်ဂ်ဝါမင်းသမီးရဲ့ ပုံမှန်မဟုတ်တဲ့ အနေအထားကြောင့် ဘုရင့်အတွင်းရေးမှူးဟောင်းနဲ့ သူမအကြားပတ်သက်မှုရှိခဲ့တယ်ဆိုတဲ့ သံသယတစ်ရပ်ဟာ တော်တော်ကြာအောင် တည်ရှိနေခဲ့ပါတယ်။ ဆုန်ခရမ်အစိုးရကတော့ ဒီတရားခံသုံးဦးစလုံးဟာ ပရီဒီရဲ့ခိုင်းစေမှုကြောင့် ဘုရင်မင်းမြတ်ကို လုပ်ကြံခဲ့တာဖြစ်တယ်လို့ ကြေငြာခဲ့ပါတယ်။ အဲဒီစွပ်စွဲမှုတွေကို ပြန်လည်ဖြေရှင်းခွင့်မရတဲ့ ပရီဒီဟာ ဆုန်ခရမ်ရဲ့စစ်အာဏာရှင်အစိုးရကို တော်လှန်ရေးလှုပ်ရှားမှုအတွက် ၁၉၄၉ခုနှစ်မှာ ထိုင်းနိုင်ငံထဲကို ခဏတဖြုတ် တိတ်တဆိတ်ဝင်ရောက်ခဲ့တာကလွဲလို့ ထိုင်းနိုင်ငံရေးလောကထဲကို တရားဝင်ပြန်အခြေချနိုင်ခြင်း လုံးဝမရှိတော့ပဲ နိုင်ငံခြားမှာ အသက်ထက်ဆုံး နေထိုင်ခဲ့ရပါတော့တယ်။ ၁၉၈၃ မေလ၂ရက်နေ့မှာ ထိုင်းဝန်ကြီးချုပ်ဟောင်း ပရီဒီဟာ ပြင်သစ်နိုင်ငံ၊ပဲရစ်မြို့မှာ ကွယ်လွန်ခဲ့ပါတယ်။

တရားခံသုံးဦးအား ရုံးတင်စစ်ဆေးနေစဉ်

နိုင်ငံတော်လုပ်ကြံမှုတရားခံအဖြစ်
သေဒဏ်အပြစ်ပေးခံရတဲ့ ဘုရင့်အပါးတော်မြဲအမှုထမ်း
Chit SinghaSeni
နိုင်ငံရေးနာမည်ဖျက်ခံရပြီး တိုင်းပြည်ကနေ အသက်လုထွက်ပြေးခဲ့ရတဲ့ ပရီဒီဟာ နောက်ပိုင်းမှာ တချိန်ကသူ့ရဲ့ကြိုးစားအားထုတ်မှုတွေ၊ တိုင်းပြည်အပေါ် အကျိုးပြုခဲ့မှုတွေကို ပြန်ဖော်ထုတ်ပေးတဲ့လူတွေကြောင့် တိုင်းပြည်ရဲ့ကျေးဇူးရှင်တစ်ဦးအဖြစ် ပြန်လည်အသိအမှတ်ပြုခံခဲ့ရပါတယ်။ ပရီဒီကို ဂုဏ်ပြုမှည့်ခေါ်ထားတဲ့ လမ်းတွေ၊တက္ကသိုလ်တွေ၊ အထိမ်းအမှတ်ပြတိုက်တွေ၊ စာကြည့်တိုက်တွေ ရှိလာတဲ့အပြင် သူ့ရဲ့နေအိမ်ကိုလည်း အများပြည်သူ လည်ပတ်တဲ့နေရာအဖြစ် သတ်မှတ်ခဲ့ပါတယ်။ ၁၉၉၉ခုနှစ်မှာ UNESCO က ထုတ်ဝေတဲ့ ပြက္ခဒိန်မှာ ပရီဒီကို ထူးချွန်ထင်ရှားတဲ့ ပုဂ္ဂိုလ်တစ်ဦးအဖြစ် မှတ်တမ်းတင်ခဲ့ပါတယ်။ ပရီဒီကို ခုလိုပြန်လည်ဂုဏ်ပြုတာကို တချိန်ကသူ့ရဲ့ရန်ဖက်ဖြစ်တဲ့ နန်းတော်အသိုင်းအ၀ိုင်းက ကန့်ကွက်မှုမရှိတာ စဉ်းစားစရာပါ။

ပရီဒီထိုင်းနိုင်ငံကနေ ထွက်ပြေးသွားပြီးနောက်ပိုင်းမှာ အသစ်စက်စက် ဘုရင်လေးဘူမိဘောနဲ့ တော်ဝင်မျိုးနွယ်တွေကို ကြည့်မရပဲ သူ့ကိုယ်သူဘုရင်တစ်ပါးလို သွေးနထင်ရောက်နေတဲ့ အာဏာရူး ၀န်ကြီးချုပ် ဗိုလ်ချုပ်ကြီးဆုန်ခရမ်တို့ ဘယ်လိုမျိုးစခန်းသွားကြမလဲ ဆိုတာကိုတော့ နောက်အပိုင်းမှာ ဆက်လက်တင်ပြပေးပါ့မယ်။

အပိုင်း (၃) ကို ဆက်လက်တင်ပြပေးပါ့မယ်။

ဘွရှင် (မြတ်သိန်းထွန်း)